An gudanar da zanga-zanga a Abuja a ranar Alhamis karkashin jagorancin Nafiu Bala, inda masu zanga-zangar suka yi kira ga Atiku Abubakar, Peter Obi, Rabiu Musa Kwankwaso da David Mark da su guji shiga jam’iyyar ADC.
Masu zanga-zangar sun zargi waɗannan manyan ‘yan siyasa da yunƙurin ƙwace jam’iyyar, suna mai cewa hakan na iya jefa ADC cikin rikici mai tsanani.
Nafiu Bala tare da ɗan majalisar wakilai, Leke Abejide, sun jagoranci magoya baya dauke da alluna masu ɗauke da saƙonni daban-daban na goyon baya.
Wannan na zuwa ne bayan wata zanga-zanga da wani ɓangaren jam’iyyar da ake dangantawa da David Mark ya gudanar a hedikwatar INEC, abin da ke nuna rikicin shugabanci na ƙaruwa.
Lamarin ya nuna yadda rikicin cikin gida ke ƙara tsananta a jam’iyyar ADC, yayin da ɓangarori ke fafatawa kan makomar jam’iyyar a siyasar Najeriya.