Sojojin Najeriya sun kama wani mutum mai shekaru 28, Ismail Muhammed, wanda ake zargi da samar da kayayyaki ga kungiyar masu tsattsauran ra’ayi ta Boko Haram a karamar hukumar Hong ta jihar Adamawa.
Sojojin rundunar 28 Task Force Brigade ne suka yi wannan kamen a ranar Alhamis a yankin Visik General, inda suka yi aiki tare da masu sintiri da mafarauta na yankin, a cewar majiyoyin tsaro.
Kayayyakin da aka samu daga wanda ake zargin sun hada da bindiga kirar AK-47, harsashi na musamman na 7.62mm, hular soji, buhu 10 na gishiri, kwalaye biyu na taliya, fakiti biyu na kayan ƙanshi, fakiti daya na tom-tom, da kuma namijin goro.
Hukumomin sun ce wanda ake zargin yana tsare a halin yanzu kuma ana ci gaba da bincike.
Kamun ya zo ne a daidai lokacin da ake ci gaba da gudanar da ayyukan soji da nufin kawo cikas ga hanyoyin samar da kayayyaki da ke da alaka da ‘yan ta’addan Boko Haram da ke aiki a yankin Arewa maso Gabashin Najeriya.