Ministan harkokin wajen Spain, Jose Manuel Albares, ya ce dole ne Isra’ila ta dakatar da kai hare-hare kan Lebanon.
“Mun yi kira a yi sassauci, amfani da diflomasiyya da komawa kan tattaunawa,” in ji shi, sannan ya kara da cewa, “ya kamata a dakatar da yaki, kuma a tabbatar cewa Iran da kungiyoyin da ke tare da ita sun daina kai hare-hare a kasashen yankin,” kamar yadda ya fada a hira da Aljazeera.
Albares ya ce dole Lebanon ta kasance cikin tsarin zaman lafiya da yarjejeniyoyin da ake tattaunawa a kansu.
Ya kara da cewa Spain na goyon bayan hukumar wanzar da zaman lafiya na Majalisar Dinkin Duniya a Lebanon UNIFIL, kuma tilas ne a dakatar da kai hari.
An kirkiri UNIFIL a watan Maris 1978 don tabbatar da ficewar Isra’ila daga Lebanon, mayar da zaman lafiya da tsaro na kasa da kasa, da kuma taimakawa gwamnatin Lebanon wajen dawo da iko a yankin.