Wani tsohon shugaban karamar hukuma a Jihar Jigawa, Shehu Sule Udi, ya fice daga jam’iyyar APC tare da komawa ADC, lamarin da ke ƙara girgiza siyasar jihar.
Rahotanni sun bayyana cewa Udi ya dauki wannan mataki ne bayan tuntubar magoya bayansa da kuma nazari kan halin da jam’iyyar ke ciki a matakai daban-daban.
A cikin wasikar da ya rubuta, ya ce ya yanke shawarar ne saboda abin da ya kira sauyin akida da kuma tafiyar da jam’iyyar da ba ta dace da manufofinsa ba, yana mai cewa hakan ya sa ya kasa ci gaba da zama a APC.
Sauya sheƙar tasa zuwa ADC na daga cikin jerin sauye-sauyen siyasa da ke faruwa a Jigawa, inda wasu manyan ‘yan siyasa ke barin APC domin neman sabuwar mafita a wasu jam’iyyu.