Hukumar harkokin teku ta ƙasar Iran ta sanar da buɗe mashigar ruwa ta Mashigar Hormuz gaba ɗaya domin zirga-zirgar jiragen kasuwanci.
Sanarwar ta biyo bayan yarjejeniyar tsagaita wuta da aka cimma a ƙasar Lebanon, inda hukumar tashoshin jiragen ruwa ta Iran ta bayyana cewa matakin zai ci gaba da aiki muddin yarjejeniyar na nan daram.
Hukumar ta kuma umarci dukkan jiragen ruwa da ke amfani da wannan mashiga da su bi ƙa’idoji da dokokin da aka shimfiɗa domin tabbatar da tsaro da ingantacciyar zirga-zirga.
An bayyana cewa buɗe mashigar na daga cikin matakan rage tashin hankali a yankin, tare da ba da damar ci gaba da harkokin kasuwanci cikin kwanciyar hankali.
Masana na ganin cewa wannan mataki na iya taimakawa wajen daidaita harkokin sufuri da tattalin arziki a yankin Gabas ta Tsakiya.